MUTA Restaurant by ATUM (Closed)

放假前夕梗係食返餐好🤤 小編一直有留意呢間 @mutarestaurant ，嘢食又日又西咁幾得意，一於試下佢。明太子雞翼·七味蛋黃醬（$78）🐔一碟共四隻，本身覺得少貴，但食落就知真材實料！入面嘅明太子唔係明太子醬，而係真明太子，清楚見到一粒粒魚春🐠 而且充滿魚味。雞翼外皮如果再脆啲會更香口，但入面確實多汁嫩滑。另外蛋黃醬🥚質地細滑，比一般街外嘅酸啲，可以解膩，認真唔錯。鍾意真明太子嘅朋友不妨試試！鯷魚·柚子·高麗菜奶酪貓耳朵（$138）🐟呢碟擺盤好靚，有啲花瓣、radish、刁草做裝飾，未食已經贏咗半。☺️ 入口鯷魚味唔算好重，但個人覺得偏鹹，好彩加咗車厘茄、柚子、青檸同刁草，味道清新啲同多咗啲層次。另外，貓耳朵確實配得好，可以兜住啲汁，可惜唔夠彈牙。如果麵質好啲同冇咁鹹，相信會更好味！😋蟹肉·海膽奶油義大利麵（$188）🦀一嚟到已經聞到好濃烈嘅海膽味，初時以為係一小篤海膽咁放面，點知原來係將海膽煮成醬汁，令到每條意粉都掛滿濃濃海膽嘅味道，面頭再鋪滿蟹肉，增加口感同鮮味。另外除左海膽，仲加咗酒同蒜片調味🍶令到味道更加提升。味道：🐽🐽🐽🐽價錢：🐽🐽🐽環境：🐽🐽🐽🐽🐽