Stormies (Closed)

係YOHO MALL行街，一期地下入口見到呢間西餐廳，夜晚非常旺，而且星期一至四叫主菜有優惠，可以買一送一，一於搏下有冇位。咁啱有張吉枱，要個半鐘後就交枱，我地快快趣就入座。前茶點咗慢煮八爪魚沙律，好大碟。八爪魚慢煮過後，非常柔軟，沙律菜有唔少，又有平常都會有嘅橄欖、青瓜、乾果，配埋甜辣嘅蜜糖芥末汁，好開胃。主菜點咗兩款，第一款係雞肉漢堡包。雞肉爆多汁，中間仲有煙肉、車打芝士，口感好濃郁，配搭嘅薯條都好脆。第二款係烤豬助骨。一見淋咗咁多醬汁，仲驚會太鹹或者油膩，但其實同豬助骨好夾。個燒烤汁係用健力士黑啤調製而成嘅，味道有d甜甜地。豬助骨特別鬆化，入口即融。見到隔離枱叫咗點品，賣相好靚，我地都想叫，不過時間有限，夠鐘交枱，下次有機會要再黎試下。