石一燒 (富多來新邨一期) (Closed)

今晚去咗大角咀食飯，裝修幾文青幾舒服，餐廳係用熱火山石板燒熟各種嘅肉類。打開餐牌見到啲肉類好精緻，選擇好多，而且呢度和牛都係來自九州，食材幾精緻及高級。套餐會有沙律，有啲菜同埋日本昆布，用上和式的醬汁。湯會係麵豉湯，不過裏面有大量嘅櫻花蝦，份量都幾足，飲完都幾飽。前菜點了一份貢丸，加咗啲日式嘅燒汁，味道濃郁。日本牛州A4和牛西冷，上枱見到油花充足，用熱石燒熟之後，入口非常嫩滑，油份及肉味好平衡，有肉香又夠油脂，日本來貨，果然品質有保證。伴碟有唔同種類嘅菇菌，放石板邊燒熟，吸收晒油香，入口味道香濃。另外西班牙豬頸肉，入口非常彈牙，師傅切咗條狀，所以口感好好，最緊要冇本地豬嘅躁味。大蝦及帶子，可以配旁邊嘅蛋黃醬，嗰醬充滿鹹香，有混合了芝士，同海鮮味道幾搭。最後嘅甜品上枱賣相一流，會有啲綠茶粉自己可以係個杯裏面慢慢用竹刷去攪拌，之後將苦澀嘅綠茶加入香甜雲呢拿雪糕一齊食，兩種兩種味道互相交融，味道不錯！雖然鋪面細細，每一個出品都幾有水準，食材都是精心挑選！