光榮冰室 (厚福街) (Closed)

路過光榮冰室，平時見好多人等食飯，難得無人排隊，就一條友直入去食。當然，行入舖都要量體溫同埋消毒，圓枱上都有隔板隔住。唔知要咩好，三蛋飯就好似稍為重口少少，就叫左C餐紅酒牛腩飯跟熱檸水（$45）。叫左之後大概兩分鐘黎野飲，五分鐘內上菜，真係茶記速度。紅酒汁正正常常，送飯幾開胃，而牛腩同蘿蔔都燘得幾腍，無骨無剩，用一個匙羹就可以食晒成碟，非常方便。老實講，味道唔係特別出眾，不過呢個價錢，呢個份量，係尖沙咀我相信都算係糧尾之選。