允升甜品

Open Now

Now Closed

其實好多年冇食過允升啲糯米糍，但係因為向海嗰間長洲平記難食咗，態度又差咗，所以就買個試一試，睇吓係咪仲keep到以前個水準。結果冇令我失望，芒果甜得嚟又多汁，皮又夠薄。15蚊嚟講我收貨。下次有機會會試吓佢啲中式糖水🤤🤤🤤至於服務態度方面，我個人覺得還算可以。我今日前後去過兩次，第一次去嗰時係晏晝，所以成間舖都好多人。我買一個糯米糍拎走都好似係豬肉榮度買豬肉咁，要爭住嗌要幾多粒糯米糍、要咩。姐姐嘅態度冇特別差，又冇特別好，正常囉。但係第二次去嘅時候係夜晚，舖頭明顯少咗好多人。嗰陣時姐姐就會多啲時間理到你，我俾完錢又會同我講拜拜，咁樣睇落其實服務態度方面都尚算可以。