碗碗香 (Closed)

同朋友見到佢新開，大家又鍾意食辣，就試下。舖位近希慎廣場，算方便。店內環境乾淨，偏細間。服務態度幾好，會推薦同介紹特色食品（貴陽粉）俾客。我地兩個人嗌左一碗紅油牛肉粉、一碗紅燒牛肉粉同埋苦丁茶凍熱各一杯。店舖幾貼心，有得揀走/多蔥、蒜、花生、油等等等等唔同配料。上菜速度快，幾分鐘左右就上哂（當時冇乜客）。碗紅油牛肉粉，嗌左小辣，但係都幾辣，如果唔食得辣，建議嗌返BB辣。兩碗粉湯底都濃郁有牛味，粉係貴陽粉，質感黏韌，似係烏冬同米線既合體，值得一試。因為我鍾意食啲煙韌野所以都幾鍾意呢個粉，但係應該係鋪頭特有嘅，係喺貴陽黎，所以唔知邊度可以買到牛肉選用上等嫩滑牛展。一碗粉，份量足，所以我地冇嗌小食。杯嘢飲係苦丁茶，飲落少少苦，冇咩特別，不過店員就話我地知係特別解辣，我地又冇特別覺得解辣。但如果有興趣嘅朋友都可以試吓飲，因為比較少地方有～