Green Common (將軍澳中心) (Closed)

近年食素嘅人越嚟越多， 就連將軍澳呢一個飲食沙漠都終於開咗一間素食店，雖然價錢比較貴，但起碼都為食素嘅人提供多一個選擇。每個套餐都可以加18蚊，選擇要湯定係要沙律，我揀咗要沙律。呢個沙律睇落都幾豐富，幾大個，材料都幾多，有火箭菜 生菜之外，亦都有番茄蘿蔔 等， 顏色上都好豐富，再加上黑醋汁，非常開胃。 另外呢一個係 黑椒汁配炸菇菌意粉，因為炸完啲菇嘅質地，就吸曬啲醬汁，食落好似肉咁，所以 都幾惹味，尤其是啱啲初初嘗試食素嘅人，就好似我呢種嘅食肉怪咁。而呢一個係佢哋新出嘅小食，係一個素牛柳粒嚟嘅， 配上芝麻蔥花同埋一啲燒汁 ，感覺唔太似食素，因為係一啲豆類製品，同埋啲醬汁咁 ，但係又唔會好似食肉咁 ，個感覺幾特別。今餐飯嘅主角就係佢，素嘅海南雞飯，望落去都幾以假亂真假，尤其是個黃薑飯非常之香， 拍得住平時食海南雞嘅油飯。不過素雞就唔算好似肉啦，因為佢冇汁嘅關係 ，個樣就真係幾似雞嘅 ，不過食落口就比較淡，建議點埋佢嘅辣醬，或者黑醬油，撈埋啲飯一齊食，咁會比較好。