Pause It (Moved) New Location

門面係靚靚落地玻璃，感覺舒服就入去坐喇。揀咗窗口吧枱位，望住人來人往嘅街道，同埋時大時細嘅雨，幾寫意喎。例牌叫咗個茶，烏龍茶夠甘香，添飲一次都仲好夠味，一壺茶夠兩個人飲。叫咗個波菜藜麥沙律，bb波菜好好食😍😍，個沙律汁好清新，有少少檸檬味同醋香，酸味適中入到口。欣賞佢加粟米粒，令個沙律多一份甜味，層次雖未算好豐富，仍然食得好滋味。波菜波蛋多士，講咗好嘢先，個多士係好食嘅，又夠脆。個汁同波菜獨立嚟睇都係唔錯，但放埋一齊，加上一個無味嘅波蛋，就好似碟頭飯，臨上枱先將所有元素放埋一齊咁。食得出誠意，但技術上可以改善。最後登場，雲石蛋糕。非常實在嘅做法，細細件已經好有飽足感，兩個人分嚟食都ok。甜度適中，無特別亮點，但都無嘢挑剔。後記：我覺得呢間cafe最大賣點係環境，有design過嘅燈光同各種配置，兩個人傾計又得，一個人hea都唔尷尬。另外佢定價好親民，五六十蚊一樣嘢食，芝士蛋糕都係二十蚊，變相可以叫多幾樣share食。