Video
Read full review
2017-10-07
10043 views
buffet食得多, 但素食buffet真係第一次, 事緣係無意中見到網上介紹素食自助餐, 睇完之後好有興趣, 以為只係香港同九龍先有, 原來荃灣都有一間, 其實我地呢幾年細食咗, 已經冇乜食buffet或者放題, 但見佢近近地又趁老公生日, 於是大解放一次啦~呢度lunch同dinner都有buffet, 而dinner就有兩個時段, 咁食buffet當然係食頭輪啦~ 由六點開始, 入座計食90分鐘, 果晚我地未夠六點已經去到, 見到都好似準備得八八九九, 雖然未開始得, 但都比我地入去坐住, 飲住嘢等~ 飲品方面, 有d茶包同即沖飲品, 試咗個薏仁, 但好難溶, 而且好杰, 唔適合食buffet時飲, 建議都係沖返杯茶飲, 消下濟, 咁先冇咁頂肚, 可以食多d嘢架嘛~唔知係咪呢度個環境太open, 為防有人食完走數, 佢係採取先付款後入座, 如果決定入去食, 就要先响門口比錢, 跟住會有張紙你貼住响你張枱邊, 以便識認~成間餐廳唔算好大, 廚房連取食物地方佔2/5, 入面食用地方佔3/5, 當然外面都可以坐, 裝修簡簡單單, 沒有特別花巧, 最特別咪就係有個食物金字塔囉~夠鐘出去拎
呢度lunch同dinner都有buffet, 而dinner就有兩個時段, 咁食buffet當然係食頭輪啦~ 由六點開始, 入座計食90分鐘, 果晚我地未夠六點已經去到, 見到都好似準備得八八九九, 雖然未開始得, 但都比我地入去坐住, 飲住嘢等~
飲品方面, 有d茶包同即沖飲品, 試咗個薏仁, 但好難溶, 而且好杰, 唔適合食buffet時飲, 建議都係沖返杯茶飲, 消下濟, 咁先冇咁頂肚, 可以食多d嘢架嘛~
唔知係咪呢度個環境太open, 為防有人食完走數, 佢係採取先付款後入座, 如果決定入去食, 就要先响門口比錢, 跟住會有張紙你貼住响你張枱邊, 以便識認~成間餐廳唔算好大, 廚房連取食物地方佔2/5, 入面食用地方佔3/5, 當然外面都可以坐, 裝修簡簡單單, 沒有特別花巧, 最特別咪就係有個食物金字塔囉~
夠鐘出去拎嘢食~ 雖然地方唔大, 但總算幾多花款, 有小食, 有凍盤, 有餸, 有即煮意粉, 有沙律, 有點心, 有湯等等, 不過佢好在樣樣都係細細件, 有d仲分開一份份用匙羮裝住, 放便拎~ 我一路睇, 阿姐一路建議我先食熱小食, 因為剛剛做好, 夠哂鮮熱辣辣, 於是我每樣夾一件, 阿姐就一路提我加汁, 仲伸手幫埋我, 真係招呼周到~
先試的有雞脾、魷魚圈、鰻魚、豬扒, 真係全部熱辣辣架, 係除咗雞脾只有外型似外, 其餘三款無論外型同味道, 真係同肉食冇乜太大分別, 仲冇咁肥膩, 不過真係要聽阿姐建議配適合的汁, 有汁仲更加好味~
話咁快第二輪開始, 拎咗個芝麻汁茄子, 海蜇配中華沙律, 肉鬆蘿蔔, 肉骨茶, 沙爹串燒~
頭果三款都係冷盤, 都係現成貨配合埋一齊, 冇乜特別, 反而我幾欣賞個肉骨茶, 真係估唔到素肉骨茶都咁有味道, 雖然d排骨變咗做素丸、素腩肉, 但真係好特別, 別有一番風味~ 但最尾果個沙爹串燒唔好食, 又un, 又勁"隔甩底"味(即係孜然粉), 為咗唔好嘥嘢, 我都係忍住放哂入口~食完個好難食的串燒後, 比我飲返個超好飲的湯, 雖然只係木瓜煲紅蘿蔔, 但超級濃味好飲, d木瓜差不多煲到溶哂, 我係咁搵先搵到少少細細舊的木瓜, 真係冇得頂, 唯一呢個係會encore的~
食到咁上下, 有個姐姐走埋嚟, 話仲有糖水, 如果我地要食時同佢講聲, 佢再裝比我地, 可能出面已經冇位放, 放在响廚房掛, 咁等陣食到七七八八再叫佢拎啦~跟住到食主菜喇~ 主菜全部都係heat住的, 所以唔怕遲d食, 依然都仲係熱辣辣~ 樣樣都有夾d, 有蘿蔔炆牛腩、海參淮山、炒菜等等, 但個味道好似個個都差不多, 味道都偏濃咗少少, 不過叫做樣樣都試下咁啦~
我地實在太細食, 以為佢款式唔多, 諗住可以全部試勻, 但最後都係唔得, 眼闊肚窄, 已經坐响度電視, 再飲茶消濟, 其實佢呢度冇電視架~ 只係我地坐响最入面, 而佢又係半開放式, 冇牆冇玻璃, 得個半身櫃, 所以可以望過隔離舖頭個電視~ 雖然飽, 但都係叫咗夾d沙律食, 我始終覺得自己洗的菜才乾淨, 所以好少响街食沙律, 最終都係夾d紅菜頭、蜜瓜、紅腰豆、粟米, 雖然佢有幾款汁, 但我都係原汁原味, 乜都唔落~
真係好想食佢個糖水同玩佢部乳酪機, 但真係飽到行都唔想行, 唯有放棄佢地, 希望下次會有機會試啦~唔知呢度平時係咪都係咁靜? 成晚都係得我地兩個客, 好似包咗場咁, 又冇人打擾, 食物任你選, 冇人同你爭, 真係唔知佢點生存? 可能假期會多人d掛?
Post
