清心齋

Open Now

Now Closed

剛剛收工去到坑口拎網購嘅貨， 咁啱見到厚德商場新開咗一個小食街，入面有唔少嘅小店，反正都要買外賣返屋企，一於試下呢一間素食嘅小店。望落款式都幾多幾吸引，除咗有一般嘅甜酸齋滷味 之外，亦有素鴨、腐皮卷，同埋唔同嘅糕點等等。正好可以買返屋企加熱，我買咗一盒大嘅齋鹵味，雖然可以揀四種唔同嘅款式，但我始終都係鍾意食酸齋同齋鴨腎，酸齋味道唔錯，酸酸甜甜好開胃，不過略嫌厚身，可能要用較剪剪開嚟食會好啲，如果店家可以剪埋畀客人就更加貼心啦！而家齋鴨腎都幾入味，不過五香粉味道都重，鍾意食濃味嘅人就比較啱。另外再買咗唔少糕點同芒果布甸做飯後甜品，糕點質感結實，尚算足料，馬豆糕好香好多豆，不過芝麻糕感覺就比較多粉厚身，如果可以滑啲就更好！芒果布甸味道就唔錯，入面有唔少芒果粒粒，不過對於我嚟講只有少少甜，我妹覺得啱啱好，各花入各眼啦，但以呢個價錢嚟講都Ok！另外仲買左素鴨同腐皮卷，不過就要返屋企自己加熱，每樣價錢都係廿蚊有找，有時拎嚟加餸都係唔錯嘅選擇。