愛家素食 (淘大商場) (Closed)

相信香港既每一個vegan都會識Loving Hut。Loving Hut其實係國際連鎖素食店，每個城市既Loving Hut都會有自己既menu，煮當地既菜式。灣仔分店曾經係我既飯堂，可惜依家已經執左，九展果間都執埋，得返淘大同新浦崗分店。淘大以前係連住間超市，依家超市冇左，不過餐廳入面都仲有啲食物賣。有一陣子冇黎，發現個menu清減左唔少，以前最愛既素蛋撻同素蛋糕冇左，好彩其他主食都仲喺度。鹵東坡其實係個名黎架啫，同東坡肉冇乜關係，不過就係一舊滷得好入味既豆製品。佢既口感唔似得豆腐軟林林，都有少少咬口，唔錯。叉燒既口感似瘦叉燒，但又唔會好乾，味道都好似真叉燒。啲餸跟埋一大碟菜，唔怕營養唔均衡，飯都好有誠意用左紅米，好過淨食白米。作為快餐，味道冇可能係天上有地下無咁。一分價錢一分貨，我對佢地既出品就十分滿意喇。