萬寶素食館 (Closed)

打邊爐係冬天少不了既活動，個個打邊爐都話要食肥牛，聽到素食邊爐就以為得菜會好dry，但其實素食邊爐一啲都唔dry，而且仲好正添！素食火窩有四款湯底，我地揀左鴛鴦湯底，一邊係清湯，一邊係沙嗲。落單前問左阿姐沙嗲湯底有冇蛋奶，佢話啲師傅都係咁食，咁應該即係冇蛋奶啦！火窩料可以散叫，但如果唔想用腦就可以叫什錦火窩，乜都有啲。我地又問多次阿姐啲火窩料有冇蛋奶，佢話得個素雞柳有蛋奶，可以幫我地換第啲料，好貼心。我地叫左一個大既什錦火窩，真係好大盤！素料啦、菜呀、菇同好多豆腐。唔鐘意食素料既可以考慮散叫。另外仲叫左個好多人都推薦既炸水餃，就咁食又得，放落湯當響鈴咁食都仲得。除左打邊爐，萬寶仲有任食生果，當晚既生果有木瓜、梨同蕃石榴。負責既叔叔成晚不停手咁去切生，唔洗擔心啲生果唔新鮮，啲姐姐仲係咁提我地去拎黎食，好貼心呀。萬寶既裝修係舊啲同老土左啲，坐亦未必坐得好舒服，但味道同服務都令人好想再黎encore！