蜂后

Open Now

Now Closed

本身去石門係諗住幫襯一間飲開嘅台式飲品店，可惜無開，意外地發現到呢間蜂后，又即管試下。為左健康著想，一於叫杯健康啲嘅紫米乳酪牛奶走冰走甜（$34）。當時正值星期六下午，客人唔多，五分鐘就有得拎。到手就梗係搖勻先飲，避免乳酪沉底吖嘛。一入口第一啖發覺有啲驚喜，真係做到唔甜！一嚟無比乳酪嘅糖份搞到走甜變有糖，有理由相信佢哋嘅乳酪含糖量不高，呢點好加分；其次係紫米夠熟，咬得開，唔會飲到甜水味，應該係𢳂紫米果陣有「庇」走糖水，同樣大大加分。整體嚟講，成杯嘢飲飽肚又唔甜，雖然同區嚟講略貴，但對得住34蚊呢個價，不俗。