Video
Read full review
2010-09-05
51 views
其實今次介紹呢間餐廳，半年以黎已走訪多次，卻未有一次用文字及相片作紀錄作分享。適逢老媽生日晚飯重臨舊地，心中感慨萬分，決定懶理其他人無謂的閒言閒語，將呢間位置隱蔽嘅餐廳介紹俾大家...星馬殿有別一般星馬餐廳，紫色加白色作佈置配以半開放式廚房同埋襯托落地酒櫃，裝潢華麗尤如一間酒吧，環境相當舒服，然而呢度賣嘅唔係正宗星馬菜色，Fusion味極濃厚...小食款色相當多，其中有幾個值得推介俾大家。第一個就係脆香蓮藕片($25)，蓮藕片切得好薄，炸得酥香又脆口，食落口感一流，絕對係佐酒小食之選。另一個我覺得必食嘅小食就係南薑汁米茄子($25)，米茄子外型非常細小呈圓筒狀，口感同味道跟平時食開嘅茄子好唔同，而南薑汁無一般薑汁果種濃烈辣味，食落微微帶酸，而且對鼻敏感更有食療效用，一啖一隻相當醒胃過癮！星馬殿有一個小食，幾次到來，連我在內加加埋埋廿多位朋友個個都齊聲讚好，就係呢個水牛芝士冬菇($35/4隻)。墨魚膠連同水牛芝士一齊釀入鮮甜又大隻嘅冬菇，上檯時已經被熱騰騰嘅香味吸引。呢個一黑一白組合，一咬落去先體驗芝士爆漿嘅快感，再細味箇中柔軟豐腴，絕對係一個令人喜出望外嘅小食，強烈推介！近年港人好中意
星馬殿有別一般星馬餐廳，紫色加白色作佈置配以半開放式廚房同埋襯托落地酒櫃，裝潢華麗尤如一間酒吧，環境相當舒服，然而呢度賣嘅唔係正宗星馬菜色，Fusion味極濃厚...
小食款色相當多，其中有幾個值得推介俾大家。第一個就係脆香蓮藕片($25)，蓮藕片切得好薄，炸得酥香又脆口，食落口感一流，絕對係佐酒小食之選。
另一個我覺得必食嘅小食就係南薑汁米茄子($25)，米茄子外型非常細小呈圓筒狀，口感同味道跟平時食開嘅茄子好唔同，而南薑汁無一般薑汁果種濃烈辣味，食落微微帶酸，而且對鼻敏感更有食療效用，一啖一隻相當醒胃過癮！
星馬殿有一個小食，幾次到來，連我在內加加埋埋廿多位朋友個個都齊聲讚好，就係呢個水牛芝士冬菇($35/4隻)。墨魚膠連同水牛芝士一齊釀入鮮甜又大隻嘅冬菇，上檯時已經被熱騰騰嘅香味吸引。呢個一黑一白組合，一咬落去先體驗芝士爆漿嘅快感，再細味箇中柔軟豐腴，絕對係一個令人喜出望外嘅小食，強烈推介！
近年港人好中意食班蘭葉製作出黎嘅食品，雖然班蘭果種綠色唔太吸引，但其獨特香味總係教人唾涎三呎。想初嚐班蘭嘅朋友，大可以試試呢度嘅班蘭雞翼($35/4隻)，將雞中翼塗上班蘭醬再炸，望落有啲似綠色天婦羅，唔好以為樣衰唔好食，食落班蘭葉味唔太濃，而且炸得香口雞肉嫩滑，幾正架！
我細細個已對咖映(Kaya)呢樣野情有獨鍾，呢度有八款唔同嘅咖映多士選擇，見到個Menu就已經開心。今次試呢個蘋果咖映鮮油蔗糖多士($22)無令我失望，烘得鬆脆嘅黑糖麵包上面，塗上一層厚厚嘅鮮油，再加上混入蘋果汁同蔗糖香味嘅咖映，正呀！下次再黎等我試埋班蘭咖映多士先～
馬莎拉炒薯仔條($42) - 用印尼菜常用嘅馬莎拉汁，將粗身連皮薯條一齊炒，估唔到效果原來係咁好味，食落甜甜地，薯香完全保留，而且無平時食果啲薯條咁熱氣添。如果一班朋友黎摸住酒杯底傾計，用呢個佐酒慢慢歎，真係唔錯架～！
講起食星馬菜又點少得食海南雞飯，呢份無骨鴛鴦海南雞飯($72)就將普通同黃金兩款雞放埋一齊，如果想份量要多啲，可以要半隻($140)或者全隻($220)。講返碟雞先，雞肉雖然都叫嫩滑，但味道上真係無乜驚喜，相比尖沙咀小店文華雞飯更加可以話差幾班，不過賣相同三色醬料都係水準之上，值得一讚！
馬拉叉燒($78) - 雖然叫做叉燒，但當然同廣東人食開果啲完全係兩回事。或者大家可以想像佢係一份燒汁豬柳，咁相信會好易理解到味道如何，特色絕對係欠奉，為求飽肚就當然無問題啦～！
主菜餐牌上有一款令我好奇到底係乜，就係呢味立體魷魚($88)，送上時見到個外型，大家都話果然好3D！魷魚筒直立碟中間，旁邊有魷魚鬚，秋葵同辣椒等伴碟，配上馬莎拉汁去煮，色香味絕對俱全...
到底呢座魷魚塔入面係乜東東？影相時，大家都諗起囍宴私房菜名物嘅千層峰，另一方面諗緊入面到底係唔係釀左糯米飯呢？開估！原來入面係咖喱炒飯～！飯粒雖然唔算乾身，但配合魷魚筒味道又幾夾，值得一試，價錢上我直頭覺得唔貴，好花心機同手工先整到架！
是日老媽生日搞搞新意思，唔要生日蛋糕，來個生日果凍！款式由廚師話事發辦，唔到最後都唔知有咩食，真正驚喜！呢個士多啤梨果凍食落絕對唔甜，亦無令人擔心嘅藥水味，又香又滑，掂呀！最特別係蠟燭下面果杯青綠色物體，原來係咖映醬！用黎同果凍mix埋一齊食，感覺好似白蓮蓉溝啫哩，又得意又好味～！
我較早前同負責人提及想要芒果或者士多啤梨做甜品，士多啤梨果凍後突然再額外送多個芒果甜品，真開心！望落係唔係好似普通左少少呢？其實入面內有乾坤...一層層甜到爆嘅芒果片，加上燒香焦糖放上面，入面係芒果粒混埋大菜糕，再釀返入芒果身入面，聽落都知手工花唔少，食落仲好好味添～！而且咁有心思嘅甜品，真係唔係度度都搵到架！
星馬殿棄除原有熱帶風情，將每樣食品都包裝到同藝術品一樣，如果你愛試新配搭，又愛玩Fusion的話，呢度絕對值得推介俾你。價錢方面，今餐六人都食到好飽，每人除返開都係$150左右，絕對係合理抵食！地點上可能會覺得唔太就腳，但其實位置就喺金鐘遠東金融中心地下，即元氣壽司後面，唔算好難搵！
Post
