麥當勞 (Moved) New Location

諗住今日下晝果餐食好D，點知公司有事，要番來坐鎮。餐好野要取消不特止，仲要搞到四點幾都未食野。走唔開，唯有叫同事狂老麥求其買樣野，佢知我至憎食嘉頓麵包，所以就算在同事間劣評如潮，都給我買了個韓式牛肉烤餅套餐。烤餅包裝有心思，中間拉開，拿出來就食得，好方便。真正的樣子跟宣傳照當然有雲泥之別。韓式牛肉加入醬汁，味道不差。如我的味道記憶沒錯，這個甜甜的醬汁跟將軍漢堡有八、九成相似，沒有什麼創新之處，加入紅蘿蔔及生菜絲，亦不覺得有幾「清新」。烤餅凍凍的，薄薄的，微微濕，完全不見佳處，不過老麥出品，又係咁上下，始終市場不是我等古老石山嘛！同事的黑椒豬柳都給我嚐了一口，好難比較，因為都差不多。套餐例牌跟中薯條，送了給同事，她有食神了！連埋杯汽水24 蚊，唔係錢的問題，事實上係食左都唔覺食左D咩。雖然老麥未必會食壞人，但會食壞個口，雖然由細食到大，但都係咁話。有得揀，食碗雲吞麵或米線好幾十倍。今日食老麥，真難忘。