響 - Hibiki 日本燒肉 (Closed)

雖然成日周圍去食嘢，但係值得重複去食嘅餐廳唔係話好多。日式燒肉店我鍾意呢間，因為性價比好高，仲要係放題，唔使就住個荷包食，食得暢快！Order紙分門別類，食物種類好多可以慢慢揀。 出面嘅飲品有茶、紙包裝、罐裝飲品、麵豉湯、唔同種類嘅酒都有。喺出邊攞完飲品，返到嚟枱面就已經有三大個頭盤。第一個就係龍蝦，每人有半隻㗎，仲有唔少膏啖啖肉。另一個就係刺身拼盤，有六種唔同嘅刺身，最好食就係海膽，用紫菜包住嚟食會更好食。仲有一碟係肉類嘅拼盤，每款肉都標註咗名稱，樣樣都少量俾你試吓味道，邊樣好食嘅可以無限再encore。肉類無乜預先調味，調味料或醬料可以自由配搭。而我最鍾意嘅就係燒菠蘿，睇佢咁深色你就知道佢好熟，特別香甜，而且仲好開胃添。另外我推介嘅係海老，大大隻，而且質素好高，必食！今次我哋食咗兩個半鐘(5:00-7:30pm)，時間非常充足。  79折每人先三百六十幾蚊。仲可以傾吓計，慢慢出去食啲甜品仔同埋雪糕。 今次MOVENPICK有楓糖合桃味，味道幾特別架。