Achacha Food & Beverage Boutique (Closed)

上網見到幾多人話好食，就諗住試下，但個體驗真係差到忍唔住要寫個負評！一入到去坐低無耐，店員就要求我地調位，調完過多陣另一位店員又要求我地再調翻去原本個個位，坐低左另一位店員又叫我地坐另一張枱，前後調左三次！店員安排差之餘，同事之間又唔溝通，要客人調黎調去，身為客人真係覺得好無奈！我地點左個餐，另外點左個小食拼盤。味道方面，餐湯分量少，味道麻麻，蒜蓉法包超薄，檸檬特飲杯無味而且酸。意大利飯都算幾好，黑松露味幾濃同料多，暫時感覺都係還好。但食完個餐過左二十分鐘，小食拼盤都仲未黎，我地叫店員跟一跟，但叫完又無回應，過左十分鐘店員又過黎問翻我地爭啲咩，係咪爭一杯野飲同個飯(其實前面都問左三次，已經話黎左，而且佢地落單，應該會知我地點左咩)，個店員好似懵下懵下咁，完全無人係諗住幫我地跟進下... 再過二十分鐘個小食拼盤都仲未黎，真係等到無哂耐性，叫佢跟左幾次，等左起碼四十五分鐘都未黎到！小食拼盤終於黎到，店員先斟水比我地，個拼盤又唔係特別好食，成餐飯都食到成肚氣。後尾食完睇翻評論先知原來好多人都係咁！服務差，上菜慢，食物又唔係特別好食，絶對唔會再幫襯呢間垃圾餐廳。