媽咪雞蛋仔 (Closed)

秋風起就令人想食啲暖笠笠嘅嘢，行過旺角見到有「媽咪雞蛋仔」就啱晒😛。小店人氣高企，放工時份大排長龍。小店顧名思義就係賣雞蛋仔🥚，鹹味甜味一應俱全，總共有超過二十款選擇，令人眼花撩亂。佢另外亦有賣格仔餅同飲品。法式檸檬芝士雞蛋仔($35)，雞蛋仔用個好精緻嘅紙盒裝住，仲有手抽，非常方便👍。我冇喺其他地方見過呢款口味，經典雞蛋仔配搭創意口味，感覺好新穎。雞蛋仔即叫即整，製作需時，出到嚟熱辣辣好正🔥。媽咪雞蛋仔外層微脆，內裡非常軟熟，而且好充實，唔係半空心。檸檬口味有兩款，而我點選嘅法式檸檬芝士就類似甜品－檸檬撻🍋，酸甜度適中，仲帶點流心嘅效果。不過重點係佢同雞蛋仔幾夾，完全無違和感，唔會格格不入。凍抹茶牛乳($24)，凡購買雞蛋仔或格仔餅，嗌飲品則可享減$4優惠🈹。我覺得其實幾抵，再加上呢度嘅飲品本身就賣得唔貴。呢杯拿鐵味道唔錯，🍵抹茶味香濃，就算無嗌少甜，甜度亦都啱啱好，而加咗奶就令佢口感變得順滑。總括嚟講，媽咪雞蛋仔冇令人失望，唔同分店嘅出品都能保持一貫高水準😋，而且從玻璃窗外圍可以見到廚房環境幾乾淨，又有條理。佢絕對係香港掃街小食嘅代表🇭🇰！