澳瑪葡國菜 (Closed)

香港嘅葡國餐廳唔知點解唔係有好多選擇，印象中响中環嗰間叫似d葡國菜，其他嘅都只不過係一間中、西合壁嘅餐廳，今次呢間亦不例外，就當係一間西餐廳算啦，好在餐廳對住個維港，我哋下午六點多入坐，啱啱睇到日景、日落景同晚景，值得加分。今朝經個apps 訂枱，再打電話去要求坐窗邊位，接缐生話唔一定有，好彩去到都安排到。坐底睇吓個餐牌，講真，心中嘅葡國菜呢？馬介休、沙甸魚、牛尾、葡國雞⋯⋯ 成個餐牌都見唔到。今晚我點嘅嘢食係⋯ 龍蝦湯、清酒煮蜆、馬介休薯仔、龍蝦併燒牛柳、西班牙海鮮飯、霹靂燒雞。雖然全部都唔係葡國菜，不過野食係ok 嘅。d蜆好大隻，幾鮮味，龍蝦湯亦夠濃，如果加少少龍蝦肉會再好d，馬介休薯仔炸得幾香，龍蝦正常啦，牛柳五成熟啱啱好又夠冧，西班牙海鮮飯就一般啦，下次可以唔試，至於個癖力燒雞，個名就勁，得個名勁囉，食落好一般。服務係唔錯，服務周到。環境唔錯，不會太嘈吵，風景靚嘅，坐位唔會太迫。整體野食、環境、服務唔錯嘅，不過就唔似係一間食葡國菜嘅餐廳囉。