張公館

Open Now

Now Closed

呢間中菜館位於V Point高層，落地大玻璃，可以眺望180度維港海景，環境開揚，座位闊落，打卡一流～ 食物方面午市提供點心，晚市主打多款中式料理，適合聚會同招待商務客戶嘅好地方👍前菜附上橋頭同花生，前者大大粒，酸甜可口十分開胃、後者脆卜卜，鹹度適中，可惜無得添加哈哈🤣 麻醬海蜇咬落爽脆，帶有嚼勁，調味啱啱好，冰冰涼涼，十分清爽～ 紅燒乳鴿賣相可愛，細細隻，外皮脆身，肉質軟嫩多汁，點埋醬汁更加惹味，附上手套方便食用，好貼心！黃湯娃娃菜份量十足，湯底清甜，娃娃菜鮮甜美味，感覺健康。個人私心推介蝦醬骨，炸至金黃酥脆，上枱時香氣四溢，外層夠薄身，食落帶蝦醬香味，咬落啖啖肉，肉質嫩滑又多汁，完全唔嚡口，配上菠蘿，幫助解膩！最後以甜點作結，橙絲清心丸綠豆爽好足料，滋潤又養身、紅棗糕即叫即整，帶淡淡紅棗香氣，味道香甜而不膩，口感煙煙韌韌，好味道呀！