容記小廚

Open Now

Now Closed

在土瓜灣附近工作後，經過見到有間新開嘅小店，於是決定跟同事去試吓。呢晚叫咗以下菜式:紅蘿蔔薏米冬瓜湯- 坐低店員就送上免費老火湯，飲落足料又消暑，很有誠意。鹹蛋蒸肉餅 - 肉餅多汁彈牙，食落一啲都唔會肥膩，加上咸香嘅鹹蛋黃，好餸飯。招牌碌鵝庄 - 呢碟餸果然係招牌，鵝肉炆得鮮嫩入味，食到陣陣鵝油香，仲有爽脆嘅鵝腎，炆得入味嘅鵝掌鵝翼，個汁似甜甜哋嘅豉油雞汁，食到停唔到口。椒鹽豬扒 - 椒鹽豬扒很惹味，一啲都唔柴，唔錯。菠蘿生炒骨 - 生炒骨外層炸粉上得唔厚，但做到薄脆掛汁，再加埋三色椒同菠蘿，味道酸酸甜甜，好開胃。蜜椒鱔球 - 鱔球炸得香脆，魚肉爽脆鮮味，完全無腥味，配上香甜嘅蜜汁，食完一件又一件。凍檸茶 - 有幾片厚切檸檬，加上香濃嘅茶底，而家真係唔多餐廳提供呢類高質檸檬茶。綠豆沙 - 味道少甜又足料，清熱之選。餐廳雖然係街坊小店，但所有出品都好有誠意，食材新鮮，味道很不錯，加上店員有禮殷勤，絕對是encore之選。