緬甸招牌湯米線 (Closed)

朋友隻寶貝狗狗要過聖誕，我哋就去咗何文田幫佢美容，放低咗寶貝狗狗要等一個鐘，所以我哋要搵個地方食個午飯，再去接佢。經過見到食緬甸嘢，都未食過緬甸菜，所以入去試下。我就叫咗個Mohinga鮮魚濃湯米線，材料十足。有豆卜、雞蛋、魚片，仲有炸到脆卜卜嘅黃豆片同炸蒜片加埋勁多嘅芫茜，香味十足。朋友就叫咗個曼德勤香茅雞配椰香飯，雖然飯就冇椰香味，但好彩啲雞夠入味，而且有好多香茅。個汁夠曬特別，又有少少㗎哩味 又有少少椰香味，但又唔似係咖哩汁，可能係緬甸嘅特色。不過要讚下佢嘅飲品，緬甸生薑檸檬蜜同緬甸清香桂圓蜜都好好飲，真材實料。生薑檸檬蜜 : 薑味濃郁配上清新嘅檸檬同蜜糖，特別好飲。清香桂圓蜜 : 有龍眼、紅棗，仲有陣陣嘅薑味配埋蜜糖，啱曬冬天依個季節，飲完成身都暖曬。