Crust Sorrento (Closed)

今晩嚟到位於將軍澳南嘅一間南意大利嘅餐廳。餐廳裝修好吸晴，以藍白為主，真係好有意大利海邊嘅vibe。周圍都有打卡位😍Menu 上有好多平時少見嘅意大利菜，價錢尚算合理。Risotto balls - 好有趣嘅小食，本身以為入面會係炸薯仔，點知切開見到有risotto！炸得香脆，而咬落去都好有口感，仲有7粒咁多～蕃茄乳清芝士烤茄子（$158）- 呢個前菜好特别，係其他意大利餐廳都無見過。呢條長條型嘅炸物原來係炸薯餅，仲混入咗茄子同蕃茄醬，好清新。黃蕃茄青醬芝士薄餅（$188）- 唔好睇少個pizza無放到肉，以為會好dry，其實加咗一整舊嘅burrata cheese，同新鮮爽口嘅蕃茄片，真係好rich好好味。不得不讚個薄餅，每啖都有好香嘅橄欖同香草香，咬落去仲要好鬆脆。烤三文魚扒（$188）- 三文魚魚肉厚身，仲烤得好香脆，配上蕃茄醬好開胃。Pastiera Slice ($48) - 最後呢個甜品都好特別，原來係Ricotta cheese 加上檸檬整成嘅批，食落唔會好甜，雖然加咗芝士都唔會覺得好漏。