明道

Open Now

Now Closed

今日放工，和朋友相聚一刻，來到了這間新開不久的明道。餐廳設計日式，放有figure公仔。應是老闆的珍藏。剛好老闆當日在場，問了他有什麼推介。牛腸鍋用嘅係九州牛腸，將肥膏剪走煮過再上枱，完全食唔到內臟嘅腥味，福岡牛腸鍋又肥又韌，相反呢度牛腸煙靭有咬口，去除咗肥膏之後一啲都唔肥膩，絕對係上佳之作。湯底係白麵豉調較的湯，配上自家製蒜辣椒調味醬，蒜味甚濃，但係一啲都唔辣。除咗牛腸，仲有日本高野豆腐，索汁一流。食晒啲牛腸之後，千祈唔好嘥咗個湯底，記得要叫山形牛A4西冷加烏冬，油脂均勻，入口即溶，啖啖肉香，令人忍唔住一片接一片。蟹膏龍蝦用上澳洲龍蝦，落咗order冇幾耐，廚師就喺我哋面前嘅魚缸撈龍蝦上嚟，喺我哋面前生劏，剝殼炒熟，再加上海膽醬同蟹膏，廚師精彩嘅表演，嫩滑彈牙嘅龍蝦肉，香氣四溢嘅海膽蟹膏香，令我對呢度菜一試難忘。自家製綠茶奶凍，香濃嘅綠茶配上自家製嘅奶凍，茶香撲鼻，奶凍嫩滑，份量再多點好嗎？日本海鹽雪糕甜味同鹽味恰到好處，絕對唔係坊間海鹽雪糕可比。享受美食嘅時光，總係過得特別快，高質素嘅食物，殷勤嘅服務，仲有熱情嘅老闆，絕對會再嚟呢間餐廳。