Crostini Bakery & Cafe (Closed)

細個嘅時候過生日，媽咪買個蛋糕慶祝已經好高興，唔會理咩味咩造型。人慢慢長大，對食物嘅要求越來越高，我覺得係呢個繁華嘅都市造就咗一班嘴刁嘅平民，其實應該要感激，皆因生存於香港。言歸正傳，講到呢間餅店～一開始就係我同朋友抱怨，而家啲連鎖西餅店越來越多，仲要總要一家喺你附近，隨手可得嘅方便令要求降低到只求外型而忽略咗內在。於是得到朋友推薦，不如試下crostini？第一次試嘅係婆婆生日嘅時候，買咗個柚子慕斯，特別為大家抄襲咗佢哋官網嘅形容：“清甜的柚子乳酪慕絲配上香軟的杏仁海綿蛋糕、柚子及椰子奶油夾心，為你提供一個清新香甜之選。”完美詮釋，最重要嘅係佢唔會好甜，口感更一流，融於口嘅美味，那次，婆婆笑到見牙唔見眼。第二次係同男友嘅週年紀念，不過由於我哋嘅紀念日唔係情人節之類嘅大日子，所以愛慕呢款蛋糕係要預訂嘅。店舖職員都好細心，由預訂到取貨都跟好足。呢款蛋糕以紅桑子夾心，配白朱古力慕絲，有少少酸軟甜美，即使對朱古力誘惑麻麻啲嘅男友都覺得好味。下次，再有需要，都會選擇crostini。店內仲有提供堂食及咖啡，有時間hea嘅話都係好好嘅選擇。