CURATOR Art & Café (Closed)

Curator Art & Cafe 西餐廳,餐廳裝修得好有格調,除咗有各款高質美食,仲有展銷品可以購買。餐廳主打藝術打印朱古力非常之特別,可以自己選擇任何圖案相片打印落杯朱古力面上面,今次我哋選擇咗梵高嘅圖案,朱古力好似藝術品一樣,估唔到味道仲要好好,入口朱古力味香濃,加上面嗰層奶味好幼滑,又香又好味。香煎帶子南瓜菠菜燴意大利飯 178元,前菜雜莓沙律配乳酪醬汁 ,沙律菜非常新鮮,配上藍莓草莓士多啤梨,又清新又開胃。帶子好大粒,每一粒都好厚,入口味道鮮甜口感彈牙爽口,肉質細嫩。意大利飯煮到啱啱好,口感煙煙靭靭食落好有咬口,香濃嘅南瓜味配上菠菜鮮味整體嘅味道好有層次,每一粒飯都掛上南瓜汁味道香濃。三文魚忌廉長通粉 168元,入口口感creamy,又唔會覺得油膩,味道有點清新嘅感覺,三文魚肉份量好多,入口魚肉香滑軟嫩,加上有少少魚油脂肪令到三文魚味道特別鮮甜,長通粉口感軟滑,配上忌廉汁嘅香味,加上三文魚整體嘅味道非常配搭。