港里冰廳 (廟街)

Open Now

Now Closed

今日喺佐敦食午餐，佐敦有好多茶餐廳，午飯時間通常都坐滿，一至兩個人食，係要搭枱嘅。今日發現呢間餐廳，原來單單喺佐敦，已經有兩間分店，一間喺彌敦道，比較多人，而另一間喺廟街，午飯時間照樣係坐滿人，不過廟街呢間，會坐得比較舒適。如果一班人來，可以坐閣樓。食物方面，午餐有好多款式可以選擇，臘腸排骨飯、楊州炒飯、咖喱牛腩飯等等，西式嘅有豬扒腸仔意粉、焗白汁雞扒意粉等等。今次我兩個人食，就叫咗「葡汁焗豬扒飯」同埋「鹹魚蒸肉餅飯」。好值得推介係鹹魚蒸肉餅，鹹魚好新鮮，肉餅好香滑，好有住家風味。飲品方面，好鍾意佢嘅奶茶，香滑有茶味。整體食物質素高，價錢合理，午餐平均消費$60/位。