程班長台灣美食 (Closed)

去開長沙灣，於是去咗程班長食晚飯。朋友介紹食台灣嘢，去嘅時候冇乜期望，都係諗住食下普通台灣菜，例如肉操飯，台式炸雞扒之類，但係都有驚喜。餐廳位於工廠大廈，餐廳外面有一個好大嘅「程班長」同埋好幾個奬狀，而內部裝修簡約。六點零鐘都有半滿座，一入職員用普通話打招呼同提供咗點菜紙，好有台灣風格。參考推介，試咗清湯半筋半牛肉麵，大腸包小腸，牛肉捲餅，紅油抄手同冬瓜茶。碗清湯半筋半肉麵雖然話係清湯底，但都見有少少紅油，微辣。湯底清甜，牛肉（係牛腩嚟嘅）「林」，口感唔錯，有D彈牙，唔韌唔鞋!大腸包小腸，即整嘅，熱辣辣。係劏開嘅糯米腸包住台灣香腸，加咗醃製青瓜片同甜酸菜。味道幾好，有甜酸菜食起嚟無咁制。牛肉捲餅都係即做，薄餅上鋪上薄牛肉，再加上鮮青瓜切條，卷成捲餅。薄餅外脆內暖，加上牛肉好好味，值得一試！至於紅油抄手，可能未能趁熱食，味道較普通，唔係太辣，食食下有咬咗啖麵粉皮感覺，因為收口位個皮有D厚。冬瓜茶標準，同係台灣當地飲嘅一樣香甜，是甜，但不覺過甜。整體嚟講，呢餐好好味。