海都海鮮酒家 (Closed)

喺灣仔附近行街，想食中餐又想坐得舒舒服服，見到呢間酒樓未試過，於是就入去試吓。由於當晚有宴會，被安排到偏廳用膳。先嚟餐前小食，銀魚仔炸得好酥脆，加埋淮鹽花生，應該係送酒佳品。蜜汁燒鱔份量較少，計落都幾貴；但魚皮燒得香脆，食到蜜糖味，魚肉爽爽哋，好香口惹味，正! 順德生煎雞嘅雞皮煎到好脆，雞肉嫩滑有鮮味，如果配料再爆得香啲入味啲就更好啦! 食完碟底有少少血水，雞肉大約係9成熟。晚餐會送糖水，我揀咗雪耳木瓜糖水，木瓜食落清甜，雪耳軟硬適中，糖水係少甜嗰種，正合我口味，個人認為比出面不少糖水店售賣嘅更優勝。員工好有禮貌，而且服務態度都幾好，食物質素又唔錯，下次經開附近都會再幫襯。