一心素食 (Closed)

有日行經牛頭角，見到有間樓上素食店，已經想試，呢日同朋友都想食清啲，就一齊嚟試吓。睇完 menu 發現原來有好多選擇，食素都唔怕悶呀! 壽司卷雜菜湯烏冬 - 跟咗和風沙律，芝麻醬配沙律菜真係好夾，壽司面加咗紫椰菜，顏色吸引又有益，中間夾咗啲甜甜哋好似肉鬆嘅餡，點埋 wasabi 同豉油，好食! 烏冬嘅湯底望落好淺色，但味道出奇地鮮味，烏冬彈牙，加埋昆布、粟米、冬菇同水耕菜，既清新又豐富，估唔到素食嘅味道都可以咁好味。日式釜鍋飯套餐 - 跟咗和風沙律、前菜同麵豉湯。麵豉湯加咗蘿蔔粒，麵豉味好濃。釜飯嚟到就已經聞到陣陣黑松露味，食得有少少似煲仔飯咁，有飯焦，裡面加咗雜菌、毛豆、蛋皮同栗子，撈勻食就最美味。大韓薑蜜 - 同朋友一樣叫咗薑蜜，喺寒冬中驅驅寒意。平時最怕食素菜好油膩，呢度完全做到少油，下次想食素食都會再嚟幫襯。