Babbo Trattoria (Closed)

難得約咗老友食飯，大家都鍾意食意大利菜，於是約咗喺 Babbo Trattoria 開飯。Meun 印得好精美，成本故事冊咁，詳細介紹不同類別食品嘅歷史同由來。意式麵包小點 - 酸酸辣辣但又好濃蕃茄味嘅蕃茄粒，放喺烘脆嘅多士上面，好開胃，再加啲橄欖油，就更加清香。蕃茄醬雞肝粗管意粉 - 店員介紹我哋試吓雞肝意粉，佢話意大利人都唔會浪費，都會食動物內臟，但會處理好，切碎咗再加埋蕃茄醬汁煮意粉，我哋聽落幾意，於是就叫嚟試吓，食落真係好驚喜，由於雞肝切到好碎，唔係好食到內臟嗰種腥味，反而食落似肉碎，但又硬硬哋，有肝嘅香味，粗管意粉好彈牙，索晒個醬料，特別得嚟又好好味。雙味 Pizza (意式牛肝菌烤雞、西西里辣味鮮蝦) - 聽店員講要做到特定要求先可以叫做拿坡里 pizza，仲要係即叫即做，所以又叫嚟試試。Pizza 餅底好鬆軟煙韌，牛肝菌烤雞 pizza 食到菌香，辣味鮮蝦 pizza 都真係幾辣，好惹味，不過我哋兩個都食到。呢餐食物味美，仲長知識，見到店員同客人都有互動交流，店員會主動介紹 off menu 食品，同建議菜式，係個唔錯嘅體驗。