紅橋餐廳

Open Now

Now Closed

呢間紅橋對正廣福道嘅巴士站，要搭巴士出城喺度入油最就腳。佢哋啲裝修同衛生以茶記嚟講幾企理的。雖然唔少營養師成日話茶餐廳嘅早餐唔健康，作為香港人，又真係唔想呢種平靚正嘅文化消失喎。尤其而家租金貴成本高，午市晚市都係用急凍肉嘅年代，早餐起碼都有隻新鮮蛋食下。當連鎖集團嘅腸蛋包+湯麵嘅組合已經邁向四十大元，又未必有得配公仔麵，更反映茶記早餐係幾咁不可取代。$34 有牛角包+炒蛋+香腸組合，同埋一碗麵。牛角包應該係其他地方交嚟，比起一般茶記嘅牛油多有誠意，算係鬆化但可惜唔係熱嘅。香腸都係行貨，好在煎得夠香。個炒蛋就真係幾好，唔會炒到全熟，依然嫩滑有蛋香，份量亦足（差唔多係連鎖集團嘅double），好滿足。麵有鮮牛肉米線揀，牛肉雖然係新鮮貨但冇乜牛味。咁嘅價錢都唔會期望有靚牛肉。