耆素銀杏館 (Moved) New Location

餐廳位於一個人流比較稀疏嘅位置，今日放工經過就入黎食。食客唔算好多，可能未係好多人認識或者會嘗試素食吧。餐館有個牆飾係銀杏嘅畫作黎，代表長壽嘅意思，我喺銀杏館嘅其他餐廳度都有見過。雖然佢地嘅餐廳風格唔一樣，但理念就好一致，就係比更多機會老人家工作，發揮佢地嘅長處。喺耆素呢度嘅員工個個都好精靈，快手，仲會同你傾下計，感覺比一般餐廳嘅員工親切。今日係黎食飯😂點知扯太遠，講返正題先！我叫左個咖喱意大利燴飯，入面有好多材料，而佢嘅素肉係用Omnipork，比起我以前食過嘅Beyond Meat好食，口感更似肉。賣相好好，有高級餐廳嘅feel。口感比一般risotto淋啲，唔太正宗，但我正是喜歡呢種🤣反而正宗嘅我會覺得太硬食唔慣。味道一流，第一啖已經覺得好驚艷，一啲都無誇張。我無諗過會咁濃味，因為我一直對素食都有個固有觀念就係好淡味。但呢個飯完美咁重塑我對素食嘅感覺。另外會有個湯可以飲，清甜美味。整體來講，今餐我好滿意呀！