常麵館 (Closed)

週六放工諗唔到食咩好，行去西鐵站途中見到呢間門面四正嘅車仔麵，先生好有興趣，但最近比較熱氣嘅我唔太想食辣嘢，清湯又太寡，咁啱見到有蕃茄湯底，非常吸引。車仔麵配料選擇頗多，三餸麵盛惠43蚊仲包熱飲，非常抵食，湯底方面除咗有我一早睇中咗嘅蕃茄薯仔洋蔥湯，仲有豬骨清湯同麻辣湯底，可以外加秘製嘅成仔辣汁、沙嗲汁、腩汁同咖喱汁。小食方面選擇亦非常多，除咗一般車仔麵店常見嘅滷水小食同蘿蔔牛腩之類，仲有甜酸齋、麻辣藕片同各式各樣嘅炸物。蕃茄薯仔洋蔥湯味道香濃，配上米線非常合適，兼顧營養同美味。配料方面我揀咗豬手、腐皮蝦卷同紫菜，份量亦相當大方。豬手係最抵食嘅配料，一共有三件，炆到軟腍入味，可以輕易咬開。腐皮蝦卷亦好有驚喜，即使浸咗落湯，外皮依然帶少少酥脆，入面包住蝦膠，鮮味彈牙。嗜辣嘅先生揀咗豬骨清湯配成仔辣汁同沙嗲汁，香辣惹味。配料方面有牛腩、肥牛同蘿蔔，牛腩軟腍入味，肥牛同蘿蔔嘅份量亦非常多。瑞士雞翼鹹淡適中，非常入味，灑上白芝麻更加香口。爽脆嘅唐生菜配上香濃嘅腩汁自然係絕配，味道恰到好處。餐廳嘅車仔麵質素唔錯，特別係蕃茄薯仔洋蔥湯底，百搭又好味，配料方面質素亦同樣高，加上環境乾淨整齊，價錢合理