車仔麵之家 (Closed)

有時真係會好掛住呢到既車仔麵，無論係佢好正既餸定湯底，雖然地理位置唔就腳，但長途跋涉都一定要食！友人極愛食呢到既甜酸齋，而我至愛的是它的魷魚。今次嗌左三餸，分別係魷魚丶甜酸齋同釀豆卜。我對麵就冇咩要求，揀左個平時食開既油麵！強烈推介大家要嗌埋辣，因為真係 好～惹～味～架～呢到係自助形式，係門口嗌餸比錢，然後再聽嗌number 攞麵。如果嗌左野飲，就係隔離個飲品櫃到自己拎！魷魚真係好脆好入味，每次都係我必嗌。另外都推薦大家試試佢既釀豆卜，入面包住蝦肉漿，豆卜就大大粒，但肉漿就得好少，但真係好味。仲可以用個豆卜索湯，正！甜酸齋都係每次必食。友人試過講笑話，冇晒甜酸齋做咩仲開舖！🤣酸酸甜甜真係好好食，我都會將佢擺落啲湯到索下先再食！一碟甜酸齋既份量都不少，有成七舊架！一定要嗌！唔洗驚食完會口渴，因為個湯底唔似有落味精。但三餸都包野飲，除左港式飲品，仲有汽水同菊花茶。呢個價黎講真係抵到爛！🤣