丸亀製麵 (Closed)

去到日本每次都要去食丸亀製麵，香港都有得食咁又點唔去食下。香港同日本一樣都係首先拎個盤之後排隊買野食同服務員講你想要咩佢地就會係你面前製作。配料，醬油，餐具及水都是自助服務。牛肉麻醬伴烏冬，烏冬彈牙，牛肉好多又唔靭，麻醬冇咩特別。熱牛蒡牛肉烏冬，湯底用日式醬油，好濃，味道唔錯，唔會話好咸，烏冬彈牙。仲有叫左個炸雞塊，外皮好脆，雞肉嫩滑。明太子溫泉蛋拌烏冬，溫泉蛋大大粒，明太子好多，三款食物撈埋一齊食好特別，仲好夾。魷魚鬚炸得乾身左D，好硬。胡麻雞柳好大塊，肉質夠嫩滑，沾上少許黑白芝麻。