酒鍋 (V Point) (Closed)

今日我家大佬話要帶我食好西，一坐低對住個靚海景已經foresee到今餐一定會好正，果然無失望！大佬發板，叫左行酒江湖，有4個鍋，分別係花雕醉雞、紅酒牛尾、啤酒魚同埋清酒海鮮鍋。平時好驚啲雞會愈煲愈老，但呢個醉雞就算留到最後食都冇問題，都一樣好滑！牛尾煮到好林，仲好肥美好好味超入味！魚索哂啤酒嘅精華，一咬就食到啤酒澀澀地嘅味，幾特別。清酒鍋嘅清酒味超濃，入面有海量嘅蜆。淨係食呢個鍋已經有好多餸，不過太好味喇，我地邊夠喉！牛肉拼盤有4款牛，牛肉下面有一大碗冰雪住，牛柳粒都幾厚肉，就係夠厚索到火鍋啲湯底先正！安格斯牛上面雪花好靚，入口即溶！大大塊嘅手切肥牛用貝殼掛起，韓牛食落都幾軟熟。（太好味幫牛大哥影左幾張寫真）新鮮象拔蚌好爽口。蝦丸都夠彈牙。冰菜表面有一粒粒水晶狀，超好食仲好高營養價值，好少火鍋店有得食，放落湯度淥幾秒就可以食，超爽！呢排好hit咸蛋魚皮，我地叫左一份，食得出同市面有包裝個啲唔同，冇咩味精，仲有好多咸蛋粒。炸豆腐裡面索哂啲湯，正。兩杯都唔錯，青瓜青檸呢個配搭好特別，好清新嘅感覺！