Food Garden ETC (Closed)

雖然係通過開飯訂位訂2:30屬於下午茶時段，不過見餐牌用緊類似午餐餐牌。環境係幾chill，燈光明亮唔刺眼。由兩點半坐到接近五點都由得你，氣氛係適合成班同事肯俾多駛多些少錢食啲高質食物慢吹、講吓辦公室政治嗰種。食物總體亦處理得相對精緻。例如「田園沙律」角落一團白色物體驟眼睇以為水牛芝士，叉落去先知係至愛兼漏哂蛋黃汁嘅班尼迪蛋。隨咗常見嘅火箭菜、青瓜、車厘茄之類謽，又加咗啲松子、核桃碎，佐料用黑醋、蛋黃汁，豐富成個口感。而粟米粒咬落煙煙靭靭似糯米粟。田園沙律都要顯示不平凡。另一款前菜「南瓜湯」冇咁花俏難以太多着墨，但幼滑南瓜天然香甜味配以沒烘燶而脆的小片多士亦唔輸蝕。搵唔到理由唔試「鮮果冰茶」。厚切西柚入杯，底藴亦係鮮西柚汁，微甜與微苦之間。飲管米造，隨住時間流逝、吸收杯內濕氣會慢慢變曲，咬了一啖，有白米嘅天然甜味，鍾意就食埋。「蒜香蟹肉大蝦意粉」蟹肉冇碎成茸，反而係一舊舊小塊似由蟹鉗抽出嚟嘅形狀，食到蟹嘅鮮味。「炸魚薯條」唔似用鯰魚，反而似鰈魚口感，炸脆後亦無損鮮魚味及其嫰滑。傾傾吓薯條過咗兩個鐘食都繼續脆。「法國春雞」都唔駛用手掰開，肉質幼嫩用刀叉都輕易切開。