養心殿台式養生鍋 (Closed)

馬鞍山呢個地方，如果唔係有朋友係呢頭返工都唔會入到嚟咁遠，今晚一班朋友嚟到呢個位於馬鞍山嘅新商場，打吓邊爐吹吓水。如果要去呢個商場就先要搭馬鐵到大水坑站再行過嚟，因為絕對係唔近市中心。餐廳有提供醬料可自行取用，但係我哋攞咗都冇點用。幾個人都想開下胃，所以就揀咗酸菜白肉湯底。我哋叫左牛肚、豬粉腸、牛肉、響鈴、台灣A菜同埋鮮甜三蔬。第一次打邊爐食牛肚，原來都好好食。牛肚爽口，一格格嗰啲位吸曬啲湯，所以非常惹味。另外仲有多個第一次，就係食豬粉腸，豬粉腸部分兜兜哋，可以盛著湯底，加上粉腸中間都係粉，撈埋啲湯食落好特別。打邊爐牛肉梗係唔少得，今次揀左手切牛肉(小份)，牛肉厚薄適中，油脂平均，牛肉味濃。呢個湯底食響鈴真係好正，吸收咗酸湯嘅味道，令啲響鈴食落唔會好油膩。台灣A菜食落就有啲似油麥菜仲有一個鮮甜三蔬，三蔬包括左淮山、秋葵同埋粟米，粟米好甜勁好食。