1988 (Closed)

觀塘工廈樓上食肆開越多，我試過好多，有唔少伏o架，但係依家1988泰式菜，唔單止一啲都唔伏，仲值得我一次又一次去幫襯。呢間1988 ，隱藏喺官塘其中一條橫街嘅工廈其中一個單位，算係比較隱蔽，但一開𨋢就會見到有指示牌，都唔太難搵。之前嚟呢度食過兩三次晚飯，都好滿意，佢有一款烤薄餅非常酥脆，點咖喱一流，而呢度嘅串燒亦都好抵食，大大份最緊要係燒得好，保留到肉汁一啲都唔乾！媽咪最鍾意食呢度嘅酸辣鳳爪，夠晒入味，每次嚟到都係必點嘅。好食嘅嘢當然要開心share，今日就介紹啲同事嚟呢度食lunch！我揀咗黃咖喱牛腩配白飯，呢樣都係我每次嚟食飯都必點嘅，我本身好怕辣，但又好鍾意咖喱嘅香味，呢款黃咖喱就啱晒我，只係好微好微嘅辣，加上濃濃嘅椰香， 同埋燜得軟淋嘅牛腩，配上白飯或者烤薄餅都係一流❣️仲有薯仔做配菜，大大碟，有時一碟自己都未必食得晒⋯朋友叫咗無骨滷水豬手飯，滷水入味，咬落全部都係肉，食到啖啖嘅骨膠原，汁料好好餸飯，要點讚！呢間餐廳無論價錢同埋質素各方面都幾好，美中不足嘅係同好多工廈餐廳一樣，比較困聲，一座滿人就變得好嘈⋯另外補充一點，呢度連平日晚市都好多人，如果要想去食，就早啲訂枱啦！