金滿膳燒味餐室 (Closed)

難得週末，梗係要約下朋友食下串燒，吹下水聯絡下感情啦。我哋兩個人太肚餓，所以一開始嗌咗好多串燒，估唔到佢啲串燒份量咁多，好彩味道上乘，唔係真係食唔曬。首先到嘅係蒜蓉燒茄子，遠遠已經聞到蒜蓉嘅香味。茄子嘅份量一啲都唔細，佢燒嘅火候啱啱好，無出現皮燒窿嘅情況，蒜蓉嘅香味夾埋油香，茄子綿密嘅口感真係可以令人食到停唔到口。之後我哋嗌咗燒五花腩同雞腎串，16蚊一串，好抵食。五花腩肥瘦適宜，火候控制得好好，一啲都唔柴，咬落口啲汁水爆曬出黎，好香口，回味無窮。燒雞腎品質都唔差，無腥味，煙韌又有咬口，值得一試。至於大扇貝108蚊有3隻，咁大隻嘅扇貝自己去買都唔平，佢哋嘅扇貝唔單抵食，仲keep到扇貝本身嘅鮮嫩多汁，而且大大啖好滿足。最後講埋錫紙焗娃娃菜38蚊一份，份量依舊好多，而且無因為燒烤嘅做法，改變佢原本清甜嘅味道。口感方面係仲有少少脆，而且好索湯汁，真係健康又美味，真心推介。