華香雞 (Closed)

灣仔駱克道368號有一間叫華香雞嘅飯店，連老外都識去食，就知道係好嘢。今晚路過華香雞，見到有一個一人豪華套餐，價錢好大眾化，只係$88 ，不但有華香雞、又有茶香雞，套餐有飯有菜有湯，健康抵食，又好食。我鍾意茶香雞嘅味道好特別有茶嘅香味，雞入味啖啖肉。華香雞調味同樣好入味，還有雞腎。雞湯浸白菜大大碟，對鍾意食菜嘅我來講，真係十分滿足。華香雞有滷水雞蛋同埋肇慶醉雞蛋，每樣叫咗一隻，肇慶醉雞蛋有特色，酒味香濃，滷水蛋香滑，各有特色。蒜蓉黑醋手拍青瓜非常之好食，用老陳醋同埋蒜蓉調味嘅青瓜新鮮脆卜卜，大大碟先至$35我覺得係必食嘅。我哋叫咗個清雞湯，枝竹白菜，白菜用香濃嘅雞湯浸住，份量好多，上面有枝竹，係健康嘅首選。晚飯平均每個人$100 ，真係平靚正。