新華茶餐廳

Open Now

Now Closed

長沙灣深水埗青山道老舖一蘿蘿，舊香港風味情懷滿載，好多都係家族經營一代傳一代，好似新華咁。要懷舊就去到盡，睇吓餐牌封面個餐廳電話號碼就知，後生啲嘅都唔知係乜東東。有二樓，疫情下一入去太子女就幫你探熱之外，坐低後有人會幫你噴消毒液清潔枱面，10分細心周到。有咩食你自己慢慢睇啦，其實都係嗰啲，要快我叫個特餐就算。絕對係好食唔好睇，每樣野質素都高。奶茶係港式茶記靈魂，呢杯不負所托，細滑回甘，絲絲入扣。沙嗲牛肉麵個面煮得啱啱好，麵爽彈又夠香。牛肉亦鮮嫩有肉味，可惜偏鹹唔係太啱自己口味。多士用嘅麵包亦高質素，新鮮有麵香而且質感軟熟稠密。每次去茶記都令你諗起全世界最難食嘅係嘉頓麵包。奄列個樣好平淡，用料亦係，但係煮得夠香滑，雖然覺得油膩咗少少。食得幾開心於是試埋佢哋出名嘅蛋撻，結果中伏。個酥皮入口即溶令你覺得唔係食緊酥皮，咁樣好唔好就見仁見智。蛋漿略嫌太稀蛋味亦都唔夠濃，整體感覺係水汪汪得個甜字。如果就係咁嘅質素我以後都唔會再食。呢餐勝在夠氣氛，食物質素亦可以接受，除個好好賣嘅蛋撻之外整體來講相當唔錯。