上海真真豆漿大王 (Closed)

住紅磡，即使未食過都一定聽過真真，因為實在好多年歷史，而且搭車經過蕪湖街都總會見到。不過真真唔近我屋企，所以印象中只係試過一兩次。趁住公眾假期去探長輩，老人家唔鍾意帶口罩所以我地做埋送外賣啦。中午時間叫外賣都要等十五分鐘，非常旺場。今次叫嘅都係招牌食物，粢飯、雞翼豬排酸辣湯麵同凍熱豆槳。加埋差唔多一百蚊，睇落唔平但係份量十足！粢飯係佢最出名，夠晒大份配料又多，榨菜味好出！而且糯米飯唔會太乾所以令人一口接一口。不過對我而言真係太大份，一個人食當晚餐都夠晒，如果有個迷你版就啱我啦。令我有驚喜係個酸辣湯麵，個酸辣湯底味道剛好亦好順口好柔，只係好微的辣小朋友都冇問題！反而酸嘅味道會出少少所以成個感覺好開胃。配埋上海麵，最初擔心外賣會發脹淋晒但反而吸埋湯汁好正！結果當然連湯飲晒啦！相對我覺得炸豬排就有點失色，上海式炸豬排通常比較乾身，但呢個實在太乾肉質太柴。叫左凍熱豆槳各一，熱豆槳係用碗，所以份量好多，而且老公話熱豆槳比凍豆槳更滑更香豆味（不過我冇試凍所以就分唔到）。