生記飯店 (Moved) New Location

同前輩食飯，對方指明要到灣仔生記。舊式粵菜格局，連伙記招呼都偏「舊式」，斟水斟到「呯拎啪冷」，但勝在菜式交到貨。枸杞浸豬潤 - 豬潤超厚身，咬落嫩滑夠味，一啲都唔腥，非常出色！另一味薑蔥桶蠔亦表現不俗，一碟四件蠔，份量唔多但勝在夠大隻，蠔有脆邊夠香口，咬到中間極肥美，蔥同薑就咁食都幾送飯。煎藕餅用嘅豬肉偏肥，咬落咸香有油份，加了馬蹄增加了口感。反而最期待嘅咕嚕肉就顯得平平無奇，教人失望。最後點了兩碗肉丸泥鯭粥，一入口嚐到咸咸米香，即刻喚起兒時在舊式粥店食嘅回憶，前輩說應是加了腐竹，我懷疑係加左皮蛋。甜品是附送的白糖糕，久違的兒時點心，微甜帶少少酸，吃的更多是回憶。