明記麵食

Open Now

Now Closed

見到唔使等位，衝左入去。明記係傳統車仔麵格局，地板裝潢碗筷陳列都有歲月痕跡，鍾意懷舊可以一去。今日食左邪惡三餸（牛肚、蘿蔔、豬腸）米食物：三樣都鹵得好入味！尤其牛肚連埋牛筋，喺香港呢個勢利講快速、高回報既地方，坊間難得有店咁好心機去炆淋佢，入口好似啫喱咁～骨膠原！蘿蔔一睇個色就要食，淋、無渣，雖然唔算清甜，但入口即溶。豬腸係肥腸，色唔係深，不過都入味（可惜當日有舊整得唔乾淨）。由於老板舀湯好似配方咁溝左幾樣，色濃但清甜，有味精，但唔太重，飲左好多都唔會過份口渴。環境：對於懷舊控呢講係一流，香港仲有幾多地方坐木材高櫈仔、用公雞碗，自閉食自己既地方？服務：全自助零服務，不過聽到人客怕辣但又想食辣魚蛋，老板二話不說俾唔辣魚蛋加辣汁，細心！感受到以前互相幫助既情懷！價錢公道，好食，難以挑剔。辣椒醬係是拉差，配料一流，但麵都係桂林夾啲。