閨•家 (美基樓) (Closed)

閨家由上圍板裝修開始，喺屯門group面書討論度已經非常之高，令到我都有啲期待佢開張。不過由佢開張大吉開始，每日都見到幾十人排隊入去懲罰，令到我有啲卻步。星期五晚媽媽唔煮飯，又諗唔到食乜，就諗起不如去閨家買外賣，支持一下。外賣條隊都一樣要排，好彩都係5至6個人，等一陣就落到單。落單時店員特別叮囑，人多外賣要等大約20分鐘。去VCity行一陣，話咁快就拎得。返到屋企嗱嗱臨試吓傳說中非常好味嘅老火湯，打開湯蓋，香氣已經飄雲成間屋，連喺廚房嘅媽媽都即刻出嚟飲湯。個湯夠香，又無味精，不過就唔係餐牌上面嘅星期五雞湯。飲完呢個例湯，令我有興趣試佢每日唔同嘅老火湯，只係$28 ，以佢真材實料嚟計，都真係非常之抵！媽媽order咖喱牛腩飯小辣，我就揀手撕雞飯，兩盒飯都大大盒，抵食！咖喱牛腩飯足料，牛腩雖然大大件，不過就炆得好淋。至於手撕雞，同出面嘅雞絲比，應該有3倍粗，勁有住家飯嘅感覺，配埋沙薑汁，送飯一流！