聰嫂·原素 (Closed)

我相信大家都食過聰嫂嘅甜品，而早前全線聰嫂甜品結束營業後，聰嫂呢兩個字就沉寂左一排，而最近就有一間新嘅餐廳叫做聰嫂原素。印象中之前北角已經有一間分店，而家再喺坑口聰嫂甜品原址重開餐廳，吸引到我去試吓。店內有塊黑板寫住大概八款嘅小菜套餐， 十分多選擇，除咗套餐外Menu上亦都有好多種類嘅素食，包括焗飯，炒粉麵飯，燉湯同埋聰嫂最出名嘅甜品。我今次就試咗佢個小菜套餐就係黑椒素叉燒同埋再另外嗌左個主食就係咖喱薯仔素牛腩飯。小菜套餐真係好抵，佢包例湯白飯同埋甜品，叉燒嘅份量都唔少，仲有幾條菜心鋪底，感覺上好健康，叉燒十分惹味，我估佢嘅做法應該係用麥芽糖烤焗過，外皮脆脆地，同出邊素食餐廳嘅叉燒都差唔多味，但都值得一試。而咖喱薯仔素牛腩飯就有好多咖喱汁，咖喱汁似港式茶餐廳咖喱，有少少辣但椰汁味重中和到個辣味，而且薯仔有炸過，所以亦都好好味，素牛腩我覺得就有少少似素咕嚕肉咁，份量都唔少。小菜套餐附送嘅甜品係芝麻糊，一向都唔係太鍾意食芝麻糊嘅我都覺得好濃郁，下次會試吓其他甜品