新竹園軒

Open Now

Now Closed

今日同屋企人過嚟飲茶，呢間我係第一次嚟，見咁多人寫食評講到咁好就嚟試吓。點知開頭就俾職員話。話說我填完點心紙交俾職員，我見個職員睇都唔睇張點心紙，我就同個職員講我叫左四款點心、一款炒烏冬。跟住個職員同我講「唔使同我講咁多野」，我當堂呆左，究竟係咩態度？老實講，我呢個level 4已經好耐無同人寫食評，但你迫到我要特登寫食評，你呢位職員都算世一。其實去到呢個位，基本上我介紹啲食物都沒意思，因為心情一定唔多唔少都有影響。但我都要公平啲講，食物方面有一定質素，特別係個芝士蝦球烏冬，芝士味濃，蝦球肉質彈牙，夠滑。蝦餃、燒賣夠大粒、足料，味道唔錯嘅，再配埋枱上嘅XO醬，更加好味。其他食物都不過不失，整體食物質素都係唔錯嘅。但想問大家究竟一個職員態度惡劣會唔會影響到你對呢間酒樓嘅觀感？你問我嘅話，我就話一定會，就算食物質素唔錯，但我要受職員氣，點都有影響，好難有下次。