Video
Read full review
2012-03-28
46 views
初聽「好樂滿」以為係個老細想改番個好意頭嘅名，好似「喜運來」呀、「好彩」呀、「福臨門」呀……之類，睇番佢啲宣傳單張，原來佢係日文嘅中文借音，原文「ホルモン」（HORUMON）取自大阪方言，意思即係「唔要都唔覺可惜嘅廢物」，據說就係有位料理大師將啲廢棄嘅內臟搞一搞，就成為一類獨特美食，仲紅遍整個大阪咁厲害。日式燒肉開到其門如市，大阪好樂滿又有咩突圍殺手鐧？就係燒內臟，五花八門，形形式式，雖則一講內臟就等同膽固醇、脂肪，但世事無絕對喎，據介紹話部份內臟其實含有天然骨膠原蛋白、豐富維他命，有美肌作用，信不信由你，但見啲內臟咁肥咁滑，反正我就信咗喇，哈哈！其實香港人有都食內臟嘅習慣，豬雜牛雜、乜潤物潤……日日都大把人排深水埗維記啦，喜歡試新嘢嘅港人應該接受到日式燒內臟。況且，店中幾十款選料，都唔係吓吓都係內臟嘅，仲有好多肉類；就算內臟，亦唔係樣樣肥騰騰嘅，再加上店子亦提供其他非燒肉料理，如炒麵、石頭鍋飯……，所以，一試無妨，唔會真係燒一燒，膽固醇就會跳爆錶嘅！況且，見識一下「刁鑽」嘅內臟部位，偶一為之，亦都係個有趣飲食經驗。為方便附近嘅返工族，星期一至五，急趕嘅午飯時間，只供應午市套餐，有成9
日式燒肉開到其門如市，大阪好樂滿又有咩突圍殺手鐧？就係燒內臟，五花八門，形形式式，雖則一講內臟就等同膽固醇、脂肪，但世事無絕對喎，據介紹話部份內臟其實含有天然骨膠原蛋白、豐富維他命，有美肌作用，信不信由你，但見啲內臟咁肥咁滑，反正我就信咗喇，哈哈！其實香港人有都食內臟嘅習慣，豬雜牛雜、乜潤物潤……日日都大把人排深水埗維記啦，喜歡試新嘢嘅港人應該接受到日式燒內臟。況且，店中幾十款選料，都唔係吓吓都係內臟嘅，仲有好多肉類；就算內臟，亦唔係樣樣肥騰騰嘅，再加上店子亦提供其他非燒肉料理，如炒麵、石頭鍋飯……，所以，一試無妨，唔會真係燒一燒，膽固醇就會跳爆錶嘅！況且，見識一下「刁鑽」嘅內臟部位，偶一為之，亦都係個有趣飲食經驗。為方便附近嘅返工族，星期一至五，急趕嘅午飯時間，只供應午市套餐，有成9款選擇，有飯、有麵、有烏冬，$39-$65，包茶啡，另外加錢可再配其他嘢。想嚟燒好樂滿，一係就閒日夜晚，一係就星期六、日喇。睇番個價位，細細碟嘅內臟或燒肉，都係$28-$58，比起一般日式燒肉相宜，而其他理料就貴少少，不過就大大份丫嘛。
今次有幸成為「好樂滿」試食嘅先頭部隊，除多謝開飯，仲有店方，佢哋唔單止提供多款個名古靈精怪嘅內臟，兼有特色嘅肉類同料理，更搵嚟一對來自大阪嘅搞笑組合Mukoangie嚟介紹吓啲內臟名，Muko（向日生）、Angie小姐久唔久出場且好落力咁搞氣氛，雖然中日混血嘅Angie能以廣東話盡量翻譯，但對於一眾唔多識日文嘅食家，感覺都係差少少。就正如老外睇星爺啲戲，我哋曉笑嘅，佢哋未必識欣賞！講講環境先，銅鑼灣租金超貴就毋容置疑啦，所以，店方亦要地盡其用，枱凳嘅格局以對坐嘅二人位為主，由於下面連接咗煤氣喉，所以啲枱係唔郁得，不過，有啲二人位孖住孖住，間接成為四人或六人枱。其實，枱與枱之間都幾狹窄，尤其中間位啲枱，加上抽風系統係以上抽式，天花之下豎立一支支抽風筒，多少都令整體空間多咗份焗促感。另外，抽風力度唔多夠，就算唔係燒到肥膏出現搶火嘅關係，有時都會出現煙火瀰漫嘅情況。此外，啲枱都幾細張，放咗個烤爐、醬汁、生菜籃，空位也所餘無幾，好彩店方特別預備一個三層嘅木架放食物，總算啲食材有掟企！除咗一部位挨牆位，其他都係無得挨嘅方凳位，凳下係個空木箱，專用嚟俾客擺隨身物品，算幾妥貼。一室鮮橙色，令人感覺幾有活力，抽風煙通貼有free WiFi貼紙，提醒你店內可免費自由上網架。
全餐試食，小弟幫佢大致細分為6個回合，頭4個係燒烤各款內臟同燒肉，尾兩個係一啲店內招牌料理。可能由於小弟生得鋼條骨格，對面嘅食家Eva為靚女一名，深覺小弟對內臟、肥肉絕對大把容量配額，所以Eva樣樣淺嚐，剩番嘅就由我包底，OK喎，我都講過我大肚能容啫！泡菜、雜綿涼拌
未入正題，先上啲前菜俾大家開開胃。灰黑紋石碗，盛著樣子火辣嘅泡菜，雖然小弟唔嗜辣，但都食咗幾舊，因為辣得入味，少少酸，確係醒神，為之一震。雜綿涼拌，有大豆芽、木耳絲、酸蘿蔔絲、芝麻菠菜，幾款食起嚟都清清新新，各有不同口感，有腍滑，有爽口，佢哋亦係我一陣食內臟時嘅良伴涼拌！
第1回合：厚切牛脷、豬沙加利、豬尾、牛沙瓜伴檸檬汁依一轉係鹽燒，所以啲肉都係以鹽同芝麻粒輕輕一醃，燒好之後沾沾獨家秘製檸檬汁嚟食，已經好夠。因為大家都係第一次燒內臟，拿捏時間唔係好識，除Mukoangie講解過，侍應們更主動幫幫手，加提點一下，稍稍講解一下食物特性，提點燒法如何、燒多久，等我哋唔晒雞手鴨腳，足見招呼很到位。
厚切牛脷 – 唔算好厚，燒1分燒就夠，質地軟腍得嚟有種咬口，牛脷不嬲係我至愛之一。檸檬汁調校過，唔會太酸，但帶有清爽檸檬香，配牛脷真係正。
豬沙加利 - 即係豬橫隔膜側，真刁鑽，極少接觸，色澤深，燒好後幾似牛肉，軟腍，唔肥，同樣點檸檬汁食就OK。
豬尾 – 望落白色一糰膏，無諗過豬尾係咁肥，怕食肥嘅人一定望而生畏呀。嚟得試食，就係神風突擊隊上身。侍應教路，逢係有肥膏嘅，盡量向上，無咁搶火兼咁大煙，了解！燒完之後都仲係感覺好肥，所以，店方另配備嘅「大阪生菜卷套餐」（$38份）就大派用場，包括生菜、蔥絲、青椒片，加埋甜辣醬、辣醬，一齊夾住啲豬尾嚟食，去咗啲油膩感之餘，味道層次都多樣化咗。小弟就有個升級版，就係加埋泡菜、雜綿涼拌同啲燒黃金蒜頭，過癮呀！
牛沙瓜 – 即係牛第四個胃，中環水記招牌之一，唔太陌生。牛沙瓜面面帶有一層脂肪，燒好之後，食落好聽啲講就係爽脆、煙韌，個人心聲就係惡「0趙」。
第2回合：雞頸肉、牛小扒、豬軟骨伴醬油經過第一階段，個爐網都黐滿肉碎，侍應小姐細心換上新網。不過，此時發覺較入位置嘅位，換網都有啲危險，所以，小貼士係揀位要揀路邊位。
依一輪係感覺大家都最讚好嘅一輪，因為3款肉都係肉多膏少嘅部份。相信亦係店方刻意嘅安排，上回合就肚滿，依個回合就暖和一下，再下一回合腸肥，等大家對燒內臟有啲新體驗得嚟，又唔會食到驚、食到漏。3款肉均以醬油醃過，所以總體而言味道濃郁啲。
雞頸肉 – 已經去咗雞皮，切成一條條大肉絲咁款，同食一般雞肉分吃唔大，係比軟嫩滑。
牛小扒 – 有別一般帶有好多「雪花」嘅和牛，真真正正嘅細塊牛扒，係牛腹位置，肉味濃，腍滑軟身又香口，正呀！
豬軟骨 – 以醬油醃始終入味好多，除軟骨部位比較硬，肉位就非常軟熟，加上少少油脂，甘香豐腴。
第3回合：牛小腸、豬吉士伴味噌醬同樣，又由侍應小姐換換爐網。由淡到濃，依轉出場就係醃味夠濃嘅味噌，燒完嘅內臟再點麵豉醬，鹹中帶甜，滿口香味。
牛腸仔 – 即係牛小腸，店方仲有牛大腸賣，俾咗個名叫牛腸哥，有緣下次一試。牛小腸嘅肥膏幾澎湃，成半吋厚，睇見隔離枱無反轉燒，搶火甚勁。又係要包生菜、涼拌嚟食，去去油膩，牛小腸無想中咁韌，又幾好食喎，係肥啲囉。
豬吉士 – 話人夠唔夠吉士（gutsy），即係夠唔夠膽，唔知點解佢借用咗當豬胃？口感爽爽脆脆，幾得意。試咗咁多款內臟嘢，食得出店家晌處理內臟時清洗得幾夠，乾淨，又無臭臊味。
第4回合：特選西冷牛肉涮涮鍋又去番淨肉嘅燒烤環節，雖然叫涮涮鍋，但就唔係水涮，係火涮，不過好蝦人燒。因為西冷牛肉切得非常薄，一落燒網好易黐，就算侍應幫手都唔易搞。不過，唔係無晒計，經過第一轉嘅失敗，再燒時就以紅衫魚煎法嚟對付，唔好急於反轉，否則黐住層皮。所以西冷鋪上烤網，千祈唔好郁佢，過1分鐘轉色後，慢慢捲住嚟反，試咗兩次都OK，咁就出到塊完整嘅特選西冷牛肉喇！
牛肉唔係咩雪花肥牛，油花唔係好多，但勝在肉嫩、牛香滿口，大啖大啖咁食，感覺豪氣。我見佢餐牌仲有一款叫特大P拖羅，豬頸肉薄切勁大塊咁款，相信做涮涮鍋都可能幾正。
第5回合：好樂滿炒麵 $52顧名思義，叫得好樂滿，即係內臟搭炒麵，不過，其實亦係店方自家信心之作。內臟有牛柏葉、牛肚、牛腸，再配上椰菜絲、大豆芽、洋蔥，調味帶些甜，炒得乾身而唔油，頗為惹味，作為臨尾墊肚嘅粉麵確係個好選擇，小弟一個人都食咗成大半碟，哈哈。
第6回合：香辣豬骨薯仔鍋 $148依個係店內唯一一款鍋物，雖然成百幾銀，但份量夠大鍋，4個人先點就合效益啲，之但係，人少可以點個細鍋嘅，$88啫。睇佢紅油泛面，就算未到四川級別，都唔係嘢少，果然辣得幾上喉，唔食得辣嘅我，湯就淺嚐半碗夠皮喇。鍋內材料甚豐富，有薯仔、豆腐、蘿蔔、唐蒿、大豆芽同豬骨，食咗咁多內臟同肉類，係時候補番多啲蔬菜平衡吓。雖然湯底頗辣，但其他材料應係後加，所以初段食嘅時候唔會太辣，蔬菜質素都幾有水準，薯仔趁未腍透，口感仲有少少鬆化，好夠薯味；豆腐軟滑豆味濃；蘿蔔又夠晒清甜；所以，整體個鍋物都好食，只可惜去到此階段我都難以以一已之力KO成個薯仔鍋，感到有啲不快。
甜品：Billiken雪糕Billiken（ビリケンさん）晌好多日本人心目中嘅吉祥物，係日本公認為考試合格、締結良緣等嘅幸運之神。依家大阪通天閣觀光塔仲有埋供奉Billiken嘅神舍，所以，佢就成為通天閣嘅象徵，向佢許願後再摸摸佢腳板底，願望就能實現，問你服未？
基於信仰原則，佢腳板我就唔摸喇，凳下張幸運紙卡就更加無謂要啦，不過，有佢嘜頭嘅雪糕我又唔怕食喎。由日本空運過嚟嘅Billiken雪糕，店方話雪糕有3款味：雲喱拿味、綠茶味同薑味，但今日試到嘅只有雲喱拿，睇出一點點雲喱拿籽，又食出重雲喱拿味，質感有啲似雪葩種沙冰感。食咗咁多熱嘢，一杯冰凍嘅雪糕為眾食家帶來滿足嘅涼快感。
Other Info. :
網上資料：牛胃有四個胃室，分別係瘤胃、網胃、重瓣胃和皺胃，其實都係牛雜嘅材料。
- [b]瘤胃[/b]俗稱為草胃或毛肚，就係牛雜裡嘅牛肚；
- [b]網胃[/b]嘅內壁呈蜂巢狀，又叫稱為蜂巢胃，即就係金錢肚；好樂滿都有供應「蜂巢」；
- [b]重瓣胃[/b]裡面有很多瓣膜，亦即是牛柏葉；
- [b]皺胃[/b]又叫做真胃，係真正用嚟消化食物嘅部份，做成牛雜後就稱為牛沙瓜或牛傘肚。
牛胃四個部份滋味各有不同，軟腍、香滑、爽脆、煙韌，各具特色。
網上資料：依個頭尖尖、兜風耳、笑笑口、眼尾上戚、得嗰三撇頭髮嘅Billiken幸運神，原來竟然係源於1908年，一位美國女藝術家所創作嘅，其靈感係來自佢夢中所見到嘅神仙喎，真係有啲估佢唔到。
(The above review is the personal opinion of a user which does not represent OpenRice's point of view.)
Post
